مهندس جلال کسائي کيوي

E-Mail: celalkivi@publicist.com

آذربايجانلي اؤيرنجيلر درگيلرينين صينفي درنکينين اساسنامه سي

(اساسنامه انجمن نشريات دانشجويان آذربايجاني)

تصويب اولوندو

 

باخيش:

ائله کي بيليرسينيز، آذربايجانلي اؤيرنجيلر درگيلرين فئستيوالي، کئچن ايلين يازسونونون(خرداد) 7نجي گونونده، تهرانين خواجه نصير بيلي يوردوندا قورولدو کي، سوروملو مودورلرين اؤزل اوتوروموندا بئله تصميم توتولدو تورکجه اؤيرنجيسل درگيلر ايچين بير صينيف قورولسون؛ و اونا گؤره  بير اساسنامه يازماق لازيم ايدي. او زامان اونا اؤن يازي(پيش نويس) تنظيم ائتمک ايچين 7 نفرليک بير هيأت سئچيلدي تا اونو يازماقدان سونرا، باشقا بوتون تورک اؤيرنجيسل درگيلري ده خبردار ائتسينلر و بير ييغينجاقدا او صينفين آد و همده اساسنامه سي اصلاح اولموش و تصويبه يئتيشسين. سئچيلميش درگيلرين آدي آلتدا گلير: «آراز(رجايي بيلي يوردو)»، «اؤيرنجي(اميرکبير بيلي يوردو)»، «چاغري(خواجه نصير بيلي يوردو)»، «سس(زنجان بيلي يوردو)»، «سهند(اصفهان بيلي يوردو)»، «ايشيق (علم و صنعت بيلي يوردو)»، «سحر(تبريز طيب علملر بيلي يوردو)»، «قوپوز(گيلان بيلي يوردو)» و بيرده آذربايجانلي بيلي يوردلولار توپلومونون نماينده سي(بونلارين ايکيسي علي البدل عضو ساييلميشلار).

بو هيأت چوخلو چاليشمالاردان سونرا اساسنامه نين اؤن يازيسين تهيه ائتدي. آنجاق سوءتفاهم و اختلافلار قاباغا گلير کي او هيأت مؤسس دير يا يوخ؟ بونا گؤره تأسفله دئديگيميز درگيلرين ياريسي اعلام ائديرلر کي بيز هيأت مؤسس ساييليريق و "کانون نشريات آذربايجاني" ني تاسيس ائديريک و لازيم دگيل کي بوتون درگيلر هيأت مؤسس ده اولســونلار. بونا گؤره هر درگي کي بو اســاسنامه ني قبـول ائتسه، ائله يه بيلر "کانونون" عضوو اولسون؛ يوخسا بوتون تورکجه درگيلرين آد يازماسينا بو کانون دا، احتياج يوخدور! بئله ليک، بو هيأت ده اؤيرنجي و آراز درگيلري بو ايشي دموکراتيک اولمايان بير ايش ساييرلار و اختلاف و ايکي دسته ليکي آرادان آپارماق ايچين تصميم توتولور کي بوتون درگيلر بير ييغينجاقدا، اساسنامه يه گؤره بيرليکده دانيشيب و سونرا تصويب ائتسينلر.

بئله اولدو کي آذر (گوز سونو) آيي نين 15 و 16نجي گونلرينده، بوتون درگيلر، ايکي اوتوروم دا چوخلو دانيشيقلار و يارقيلاردان سونرا، «انجمن نشريات دانشجويان آذربايجاني»نين اساسنامه سينين تصويبيندن سونرا، هيأت مؤسس آديندا اونو امضالاديلار و يئني دن 7نفرليک بير هيأت سئچديلر کي تکجه بو درنکين(انجمنين) مجوز آلينماسينين داليسيجا اولسونلار و مجوز آلماقدان سونرا آذربايجانلي اؤيرنجيلرين بيرينجي گئنل قورولتايينين(مجمع عمومي) تشکيل تاپماسي ايچين  کي اوندا "شوراي مرکزي" سئچيله جک، چاليشسينلار.

"چوخ قوتلو اولسون"

 

ü      کئچميش ساييدا، آذربايجانلي اؤيرنجيلر درگيلرين فئستيواليندا اولان سوروملو مودورلرين اؤزل اوتوروم دا کي  دانيشيقلاردان بير خلاصه يازميشديق کي اوخوجولارين استقبالي ايله قارشيلاشديق؛ بو ساييدا دا ايسته ييريک ايستکلي اوخوجولاريميز، «انجمن نشريات دانشجويان آذربايجاني» اساسنامه سينين تصويب اولونماق اوتوروملاريندا اولان بحثلردن، مطلع اولسونلار:(بونودا دئييم کي آرادا هئچ سانسور يوخدور؛ اولورسا، بوناگؤره دير: "منيم فيکريم اويان-بويانا قاچيب و بير نکته لري گؤتورمه ميشدير!)

 

جومه آخشامي؛

 سکسنينجي ايلين آذر آيينين 15نجي گونو:

*   قرار بونا ايدي کي بيرينجي اوتوروم ساعات 14 ده "جان آذربايجان درگي سينين دفترينده" باشلانسين. آنجاق تورک گنجلر هميشه ايش چاغيندا حاضير اولارلار! جلسه رسماً ساعات ايکي ياريمدا سلطاني جنابلارينين(اؤيرنجي درگيسي طرفيندن) سؤزلريله باشلاندي کي چوخ موضوعلاري اوستده کي سؤزلر کيمي ايدي و سونرا شرکت ائدن درگيلرين ائلچيلر اؤزلريني تانيتماغا باشلاديلار:

1-       ياشيل يول (خوي پيام نور بيلي يوردوندان)

2-      دان اولدوزو (اصفهان تکنولوژي بيلي يوردوندان)

3-     سحر (تبريز طيب علملر بيلي يوردوندان)

4-     اردم (تهران بيلي يوردوندان)

5-      بيرليک ( طباطبايي بيلي يوردوندان)

6-      باريش (تبريز طيب علملر بيلي يوردوندان)

7-     خزر (آذربايجان تربيت معلم بيلي يوردوندان)

8-     دوزگون خبر (تهران بيلي يوردوندان)

9-      اولدوز (تهران بيلي يوردوندان)

10-    ائلسسي (تربيت مدرس بيلي يوردوندان)

11-     آراز (تبريز بيلي يوردوندان)

12-    اولدوز (اورمو بيلي يوردوندان)

13-   باخيش (اورمو بيلي يوردوندان)

14-   آراز (شهيدرجايي بيلي يوردوندان)

15-   اؤيرنجي (اميرکبير بيلي يوردوندان)

*   سونرا اساسنامه نين اوخونماغي باشلاندي و هر ماده و بند ده کيمسه نين نظري اولسايدي، سؤزونو دئييردي. بو صينفين آد  قويماسي اؤيرنجيلر ايچين چوخ اؤنملي دير! "کانون" يا "انجمن"؟

*   علوم وزارتينين سؤزلرينه گؤره، بو ايکي کلمه نين آراسيندا چوخ فرق يوخدور.

*   بو صينفين آدينين آرديندا "آذربايجانلي" کلمه سي گلسه مومکوندور کي "قاشقاي" و باشقا تورک اؤيرنجيلره چتين ليک ياراتسين. بير "بند"ده بونا اشاره اولسون کي اونلاردا ائله يه بيلرلر بو صينف ده عضو اولسونلار.

*   آد مسأله سينين اؤنمينه گؤره، چوخ واقت قويماليييق.

*   بو ايکي آدين ايچيندن بيريني گرک سئچک: «انجمن نشريات دانشجويان آذربايجاني»

«کانون نشريات دانشجويان آذربايجاني»

سس آلينماقلا "انجمن" تصويب اولوندو.

*   البته "اؤيرنجيسل" و "اؤيرنجيلر" کلمه سينين اوستونده ده بحث اولوندو کي اؤيرنجيلر، "اؤيرنجيلر" کلمه سيني به يه نديلر.

*   چئشيدلي نظرلر بوراخيلير؛ "آذربايجاندا چوخلو اؤيرنجيسل درگي واردير کي آذربايجانين مدني و اولوسال حقلريندن دانيشماييرلار. آيا اونلاردا ائله يه بيلرلر بو درنک ده عضو اولسونلار؟"؛ بئله سونوج(نتيجه) اله گلير کي عضويت شرطلرينين بيري بو اؤزلليکي گؤسترسين.

 

اساسنامه نين وظيفه لر و هدفلر بؤلومو:

*   سياسي کلمه سيني بيرينجي بند ده يازاق مي يا يوخ؟

*   ايکينجي بند ده "آذربايجاني"، "ترکي"دن سونرا پوزولدو.

*   دؤردونجو بند چون تکرار اولونموش معناسي وار ايدي حذف اولوندو.

*   "سوبسيد" کلمه سينين يئرينه "يارانه" يازيلميشدير؛ بو تورکلرين "فارسي را پاس بداريم" رولوندا داها آرتيق گؤسته رير!

*   4-2 بندينده آذربايجان مسأله لرينه باخاق مي يا يوخ؟(هامي دئيير:"هن")

اساسنامه نين ارکان بؤلومو:

*   «مجمع عمومي»دا نئچه نفر شرکت ائتسين؟ 20 نفر يا آز؟

*   مجمع عمومي،فئستيوال دگيل کي هر درگي دن چوخ سايي دا آدام گلسين؛ اولا بيلر کي يانليش فيکر اولوب.

*   بو نظره اعتراض اولوندو. چوخلوق کانونون گوجونو گؤسته رر.

*   سوندا، 2نفر(سوروملو مودور ايله 3 نفر) تصويب اولوندو.

*   نظارت هيأتي(نظارت استصوابي ايچين)نين اوزرينده بير چوخ دانيشيق اولوندو. بير سايي اونون اولماغيني "شوراي نگهبانا" اوخشاتميش و اونلا مخالف ايديلر.

*   رأي آلماقدان سونرا اونون اولماغي لازيم گؤروندو.(آنجاق بللي اولمادي نظارت هيأتين، گودوکجو هيأتي کيم اولاجاقدير؟!!)

*   افطاردان سونراکي دانيشيقلاردا، درنکين مؤهور اولماغي لازيم گؤروندو و بير بند ده تصويب اولوندو کي هاچان لازيم اولورسا، اساسنامه نين بعضي يئرلري دگيشيلسين.

% گئجه 18:30 ده جلسه سونا چاتدي.

 

جومه؛

 سکسنينجي ايلين آذر آيينين 16نجي گونو:

*   ساعات 11:30 ده ايکينجي اوتوروم باشلاندي.(15 دقيقه اويان بويان اولماق ائله ده پيس دگيل!)

*   اساسنامه نين هيأت مؤسس سئچيلمه يينه گؤره بحثلرين سونوجوندا قرار بئله اولدو:"کئچن گون تصحيح اولونموش اساسنامه ني، بوتون درگيلر هيأت مؤسس آدي ايله امضالاسينلار؛ وزارت علوم بو ايش ايله مخالف اولورسا، اونلار کي بوگون سئچيله جکلر هيأت مؤسس آدلانسينلار."

 , آدايلار:

آراز (شهيدرجايي بيلي يوردوندان)، اردم، بيرليک، باريش، دوزگون خبر، اولدوز(تهران)، اولدوز(اورمو)، باخيش، اؤيرنجي

/ سئچگي نين سونوجو:

1-       اؤيرنجي(20 رأي)

2-      سحر (20 رأي)

3-     اردم (19 رأي)

4-     باريش (15 رأي)

5-     دوزگون خبر (15 رأي)

6-      آراز (14 رأي)

7-     اولدوز؛ اورمو (12 رأي)

8-     بيرليک (9 رأي)

9-      اولدوز؛ تهران (4 رأي)

(8و9 نجو درگيلر علي البدل تعيين اولدولار)

*   بو درگيلر، تکجه، درنکين اساسنامه سيني "وزارت علوم"دا تصويبه يئتيرمگينه گؤره چاليشاجاقلار.

*   تصحيح اولونموش اساسنامه ني "بدلي" جنابلاري بير ساعاتدان سونرا گتيرديلر و سوروملو مودورلر، اونو امضالاديلار.

 

ايلک دانيشيقلار:

*   تورک ديلي اورتوقرافي نين تصويب ائتديکلري، ياخشي دير بيزيم درگيلرده ايشه آپاريلسين.

*   درگيلرين ياييلماق چتينليکلري، بو آرادا چؤزولمه لي دير.

*   بيزيم گئنل ايلگيلر(روابط عمومي) سيستمي گرک گوجلنسين؛ درنکيميزين تبليغاتي، بوتون درگيلرين تانينماسي و هدفلريميزين يئرينه چاتماغينا باعيث اولار.

*   ياخشي دير درگيلر اؤز سليقه و يازي چئشيدلريني بو درنک ده بيلديرسينلر.

þ بيزه مجوز وئريلمه سه ده، گرک اؤز بيرليگيميزي ساخلاييب و گوجلنديرک.

*   80نجي ايلين قيش سونوندا، ايرانين بوتون اؤيرنجيسل درگيلر فئستيوالي قورولاجاقدير؛ بيرليگيميزي گؤسترمک ايچين اورادا بير باشقا اتاق(تورک درگيلر ايچين) آلاق.(دئمه لي دير بو فئستيوالدا کي کئچن ايلين اسفند آييندا قورولدو، تورکجه درگيلرين گوجلو شرکتلري اولدو؛ آنجاق مشترک بير اتاق آلابيلمه ديلر. البته گوج ايله دئيه بيله ريک، آرادا  "دان اولدوزو" ان چاليشقان درگي ايدي و اؤزل سايي يايماقلا تورک اؤيرنجيلرين فعاليتيني ده يه رلي گؤستردي. بو اؤزل سايينين ايلک صفحه سي بو سايي دا گلميشدير).

*    آراشديرما قوروپلارين قورولماسي، درگيلر و هم درنک ده چوخ اؤنملي دير.

*   ايندي و بو گون سؤزو دانيشماق، چوخ ده يه رلي دير. درگيلرده، تکجه اسکي تاريخدن سؤز آچماق، بيزي اولوس دا کي گئرچکلردن آييرابيلر. درگيلرده، گرک اکونوميک و صنعت مسأله لري آچيقلانيب، عمومي و تخصصي شکيلده آراشديريلسين.

I  آرادا چاغري، قوپوز، سس درگيلرين طرفيندن کي اينديه دک مجلس ده دگيلديلر، گلديلر. "ارکين موسوي"، چاغرينين سوروملو مودورو اوتوراندان سونرا اوجا سس ايله دئدي:«بيز چاغيريلماميش گلميشيک ها!»

*   بوراخيلدي کي ياي دا و درس اولمايان چاغلاردا بير سيرا درگيسل آراشديرما و اؤيره تيم اوردولاري قورولسون.

*   آستاجا، بحثلر دؤنور! چاغري نين سوروملو مودورو آرتيق تانيشليق و بحثي آچماق ايچين بيزلردن سوروشور، سيز کيمسينيز؟ سونرا اؤزو دانيشماغا باشلايير و معني لي تشکر ائدير.

*   بورادا AzBilTop و اؤزباشينا تشکيل تاپميش "کانون نشريات آذربايجاني" آراسيندا اولان، کئچميش بحثلر آرايا گلير. من و باشقا خبرسيز(!) درگيلر ايچين بو سؤزلر چوخ عجيب و يئرسيز دير. ائله بيل بو قارشيلاشما دوام ائده جکدير؛ کئشگه فوتبال ياريشي تک آرتيق واقتا چکمه سين!!

E اونلار دئييرلر: "نه ايچين AzBilTop هر زادي اؤز "آد"ي ايله يايير؟ مثلاً فئستيوالين ايشلري؛ او حالدا کي "چاغري" درگيسينده اولان اؤيرنجيلر، بو ايشي چوخلو چتينليکلر ايله اؤز بيلي يوردلاريندا قورموشلار و ... .

G ان آزِي من ايچين، ايلک ده بئله نظره گلدي کي "هيأت مؤسس" مسأله سي بو سؤزلري آرايا گتيرميشدير.

F آما AzBilTop دئيير: «فئستيوال ايشلرينين برنامه لريني بيز تؤکموشدوک و اؤنجه قرار ايدي کي فئستيوال، "بهشتي بيلي يوردوندا" اولسون و بوتون دعوتنامه لر، تقديرلر و پوسترلر AzBilTop مؤهورو يئميشلر.»

*   سونرا AzBilTop طرفيندن بو اختلافين کؤکو آچيقلانير:"شخصي علتلر"!

*   باريشماق ايچين بوتون اؤيرنجيلر چاليشيرلار:"بوتون درگيلرين بير کانونو اولار، نئيه مظلوم آذربايجان درگيلرينين ايکي کانونو اولسون."

*   اونلار دئييرلر: «بيز اکثريت ده اولان درگيلرين تصميملريني قبول ائديريک و اونو امضالاييريق.»

*   بير سايي درگيلرين قاپاديلماسي آرايا گلير؛ "نئيه بو راحاتچيليقدا دئييرسينيز: «چيچک، چاغري، آينا و دان اولدوزو(اردبيل) باغلانميشلار؟»؛ هئچ فيکر ائتمه ييرسينيز اؤز درگينيزين ده باشينا گله بيلر!".

*   مخالف درگيلرين زحمتلريندن تشکر ائتمک و هم اونلارين اشتياق و اصرارينا گؤره، سئچگي بير داها دا قورولاجاقدير. بيزيم ده بير سؤز يوخوموزدور!

*   دان اولدوزو طرفيندن من تکجه  بونا گؤره آداي اولدوم کي گؤردوم هدفلر دگيشيلمکده دير! بيز کي بيرليکدن چوخ دم ووراريق، کيچيک و شخصي هدفلره چوخ فيکر ائديريک!

. ايکينجي سئچگي نين سونوجو آشاغي دا گلميشدير. من رأي گتيرمه ديم. بوراني "دان اولدوزو" دا يازماق مني قورخودور!!

1- اؤيرنجي (20 رأي)

2- سحر (20 رأي)

3- اولدوز؛ اورمو (16 رأي)

4- باريش (15 رأي)

5- چاغري (14 رأي)

6- اردم (13 رأي)

7- دوزگون خبر (10 رأي)

8- آراز (10 رأي)

9- ائل سسي (10 رأي)

10- دان اولدوزو (8 رأي)

11- بيرليک (2 رأي)

(8و9 نجو درگيلر علي البدل تعيين اولدولار)

*   بئله ليکله، اوستده سئچيلميش درگيلر، درنکين تصويب اولماق ايشلرين داليسيجا اولاجاقلار و بيز(باشقا درگيلر) اليميزدن گلن يارديملاري گؤستـــه ره جه ييک.

% اوتوروم باشاري و باريش ايله ساعات 15:45 ده قورتاردي.

 

Get Yuxarı بالای صفحه

بازگشت به صفحه اصلی

Ana Sehifeye qayıtmaqıçın buranı kılikleyin