|
|
|
يازار: علی صمدلی کـؤچورن: محمد کاتب نظام آبادی
E-Mail:
mkna_iut@yahoo.com |
قــــــانلي بنــؤوشه*
|
ظريف بو گئجه‌كيمي قورخمالي يوخو گؤرمه
ميشدير. گولوش‌قاباق
سيرانوش خالا كي هميشه اونو خوش سؤزلرايله
دينديريردي، يوخودا اجيننه صيفتينده اونو بوغوردو. سورن دايينين الينده‌كي ايتي
قيلينجدان دامجي دامجي قان سوزوردو. بو قان اونون اوست و باشينا و ان چوخ‌دا
گؤزلرينه چيلنميشدي. الينده قان سوزولن قيلينج اولان سورن دايينين گؤزلري قان
سوزولن قيلينجدان چوخ قورخمالي گؤرونوردو. اونلارين قيزلاري، سوسن و رزانين اللري
و اتكلري داشلان دولويدو. او داشلارين هاميسيني سيرانوش خالانين الينده بوغولان
ظريفين باشينا وورماغا حاضير
ايديلر. بوتون بو
دهشتلرين هاميسينا دؤزمك اولاردي، تكجه اگر ظريفين سسي چيخيب ،آنا ، دئيه چاغيرا
بيلسه
يدي. ياخشي‌كي، قورخمالي
يوخودان تئز آييلدي، يوخسا اوره‌يي پارتلاياجايدي. گؤزونو آچاندا اؤزونو
قان تر ايچينده گؤردو. بونا گؤره‌كي، بو عذاب
و ايشکنجه نين يوخو
اولدوغونا سئويندی,
هئچ‌كيمي سسله مدي.
بيليردي‌كي آتا و آناسي سحرلر اونو يوخودا قويوب ايشه گئديرلر. ايستدي ياتاغيندان
قالخا، آنجاق قالخا بيلمدی.
ائله بيل‌كي اوستونه داش قالاميشديلار. آجي آغريدان ال و قولونو ترپده بيلمدي.
يواش‌ـ‌يواش اؤزونه
گليب ياتاغيندان قالخدي.
گونش چوخدان چيخميشدي. ياز هاواسي ايدي. ائشيكده سئرچه لرين سسيندن قولاخ توتولوردو. اليني ايوانين قيراغينداكي لولكلي پارچا آپاراندا گؤردوكي بوم بوشدور.آخي آناسي سحرلر اونو دولدوروب، قويوركي قيزي ال اوزونو يوسون. گؤردوكي يئر ياشدي .كيمسه اونون سويونو يئره بوشالديب. پارچي دولدورماق اوچون حيه‌ته دوشنده گؤردوكي آتاسينين دونن اكديغي قيزيل گول كوللاريني كيمسه سينديريب. ال اوزونو يويوب انباردان بير سيني دن گؤتوروب تويوقلارا دودوله دي. تويوقلار گلدي. آنجاق لاري خوروز و پاپاقلي فره گؤزونه، ده يمدي. آختاردي، آختاردي، تاپا بيلمدي.
چاي و چوره ييني يئييب، كوچه يه چيخدي. سوسن‌گيلين دوققازلارينا ياناشدي. سوسنله روزا، ايكي باجي حيه‌تده اويناييرديلار.
ـ سوسن ، آي سوسن !
ـ سوسن ، آي سوسن !
نه سوسن و نه رزا اونا هاي وئرمديلر. ظريف حيه‌ته گئچدي و اونلارا ياناشدي.
ـ بيزيم لاري خوروز، پاپاقلي فره تويوق سيزين حيه‌ته گلمه ييب. قيزلارين هئچ بيريندن سس چيخمادي. اوزلريني يانا چئويريب آغيزلاريني بوزدولر. ظريف گؤزلرينه اينانمادي. گؤردويو دهشتلي يوخونو خاطيرلادي. اونا ائله گلدي بو ساعت قيزلارين آناسي چيخيب اؤز اجيننه بارماقلاريلا، اونو بوغاجاق. اوندان اوز دؤندرن رزا و سوسن باشينا داش ياغديراجاقلار. قيز قورخوب گئری دؤندو. باغي, باخچاني گزيب لاري خوروزو و پاپاقلي فره‌ني آختاردي- آختاردي تاپا بيلمدي. بو سونلاردا تويوقلارين بيرينجي ايتمكلري دئييلدي.
ظريف نه تويوقلارين ايتمه سينه، نه پارچين كيمسه طرفيندن داغيلماسينا، نه گول كوللارينين سينديريلماسينا، نه اونونلا بيريئرده اوينايان قونشــــــو قيزلارين اونون چاغــــيريشينا سس وئرمه ملرينه، نه ده گؤردويو او قورخمالي يوخولارا اينانا بيلميردي.
گون باتدي. آتـــا و آنـاسي ايشدن قاييتديلار. قيز تويوقلارين ايتمه سيني آتـاسينا، گؤردويو قورخمالي يوخوسونو آنـاسينا سؤيله دي. اونا ائله گلدي‌كي، تويوقلارين ايتمه سينه گؤره آتاسي اوندان چوخ مايوس اولدو. اونا ائله گلدي‌كي سؤيله دييي قورخمالي يوخودان آناسي اونداندا چوخ قورخدو. آنجاق نه دنسه هئچ بيري دينيب دانيشماديلار. بالاجا ظريف بونا چوخ تعجب ائديردي.
سون گونلرده نه سيرانوش خالا اونلارا گليردي، نه‌ده آناسي اونلارا گئديردي. حتي بيرگون گؤزو ايله گؤردوكي، سورنله اوز اوزه گلن آتاسي سلاملاشمادان اوندان يان اؤتوب کئچدي.
قيز يئنه سحري گون اؤز عادتينجه يوخودان دوروب، ال اوزونو يودو. تويوقلاري سسله ييب دن سپدي. سونرا داريخيب كوچه‌يه چيخدي. اؤز عادتينجه، گؤردوكي سوسن‌گيلين حيه‌تينده دير. آرالاريندا هئچ نه اولماييبميش‌كيمي اوزونو اونا توتاراق :
ـ آخچي، آي آخچي، گئدك دره‌يه بنووشه ييغمايا…، دئدي.
سوسندن سس چيخمادي. او ظريفه ديليني چيخارديب، قاچيب باجيسي رزانين يانينا گئتدي.ظريف كور پئشمان اونلارين حيه‌تيندن چيخدي. يازيق قيز بيلميردي كيمينله اويناسين. هارا گئتسين. اوز آشاغي يوللاندي. گليب دره‌يه يئتيشدي. كول ديبيندن يئنيجه آچيليب بويلانان بنووشه‌لري گؤروب سئويندي. بنوشه‌لر بويونو بوكه‌رك ائله بيل اونون يولونو گؤزله ييرديلر.
ظريف اليني اوزاديب كول ديبيندن بير بنووشه اوزدو. او اووجوندان بو اووجونا قويوب بو ظريف چيچكي دويونجا تاماشا ائله دي. سونرادا دسته باغلاماق اوچون اونلاري درمه‌يه باشلادي. نه آز، نه چوخ ايكي دسته باغلادي.
ـ بيري آتامين، بيري‌ده آنامين، دئدي.
ظريف قاييتدي. ائله‌بيل سوسنله رزا پوسقودا دايانميشديلار. دوققازلاريندا قيزين قاباغين كسديلر. بنووشه دسته‌لرينين ايكيسينده اونون اليندن آليب اؤزونوده دؤيدولر. ظريف آغلايا، آغلايا ائوه دؤندو. همين گوندن ظريفين قارا گونلري باشلادي. قورخوسوندان گولونون آلينماسيني، دؤيولمه سيني آتا و آناسينا دئمدي. او بيليردي‌كي بو كندده ارمنيلر اونلاردان چوخدو. او بيليردي‌كي قوهوم و اقرابالاري بو دوغما كندي چوخدان ترك ائتميشديلر. او بيليردي‌كي بو حدده قورخولارا دؤزمه‌ييب بير گون اونلاردا بو دوغما اود، اوجاقلاريني ترك ائتمه لي اولاجاقلار. ظريف ايندي نه گئجه عيفريته صيفتينده اونو بوغان سيرانوش خالادان، نه قيلينجيندان قان دامان سورن داييدان اينجيييردي. هئچ رزادان‌دا بير او قدر اينجيميردي. اونا درد اولان سوسنين اوندان اوز دؤنده‌رمه ييدي، آخي سوسن هر ياز گلنده اؤزو اونوسسله ييب دره‌يه، بنووشه ييغمايا گئدردي، آخي سوسن دردييي بنووشه‌لردن باغلاديغي دسته‌نين بيرينجي‌سينی ظريفه يه وئرردي، آخي اونلار ايكيسي‌ده بو پاييز بيرليكده مكتبه گئده جكديلر، آخي آناسي ظريفه تيكدييي گوللو ايپك دوندان بيرينده سوسنه تيكميشدي، آخي اونلار تزه تووله تيكنده كمك ائتمكده ان چوخ جان يانديران سورن دايي اولموشدو. ظريف بو سؤاللارين بورولغانيندا بوغولوب قالير، بير يانا چيخا بيلميردي.
بو دهشتلي سؤاللارين بورولغانلاريندا باتيب قالان تكجه ظريف دئييلدي. هم‌ده اونون آتا و آناسي‌ايدي. ظريف نئچه گون‌ايدي تكلييه دؤزوردو. آنجاق بو سحر صبري لاپ توكندي. آياقلاريني سورويه سورويه سوسن‌گيله گئتدي. سوسن حيه‌تده تك اويناييردي. بير آياق، بير آياق گئديب اونا ياناشدي. اوزونو توپلاييب :
- آي آخچي من سنه نه پيسليك ائله‌ميشم؟ دئدي.
- سوسن اوزونو يانا چئويردي. ظريف اوندان ال چكمدي. سؤاليني بيرده تكرار ائتدي. نهايت، سوسن ديللندي:
سن توركسن، سيز بيزيم دوشمنيميزسينيز. آنام دئييركي، سنينله اوينامايام.
ظريف باخدي، باخدي، بو قيزين سؤزلريندن هئچ نه آنلامادي. نه تورك سؤزونو، نه‌ده دوشمن سؤزونو. يئنه كور پئشمان ائولرينه دؤندو. آخشام آتاسي ايشدن گلنده اونون بوينونا ساريليب سوروشدو:
- آتا، دوشمن نه‌دير؟
- آتاسي بير قده‌ر دوروخدو. بيلمدي قيزينا نه جواب وئرسين.
- قيزيم، بو سؤزو كيمدن ائشيتميسن؟
- سوسندن. اؤ دئدي‌كي، بيز دوشمنيك.
- قيزيم دوشمن اونلاردي. بيز دوستوق.
- بس تورك كيمدير؟
- تورك بيزيک, قيزيم.
- بس بيز آذربايجانلي دئييليك؟
- يوخ قيزيم، آذربايجان بيزيم توپراقيميزين آديدير.بيزي تورك دونياسيندان آييرماق اوچون ميللتيميزي، دينيميزي، اليفباميزي اليميزدن آليبلار. بؤيوينده بونلارين هاميسيني بيله جكسن.
آتا بو سؤزلري دئديكجه قهر اونو بوغوردو. گؤزلري ياشلا دولوب، بوشاليردي. بو زامان ائله كيمسه چپرين اوستوندن، آتاسينين گؤزونون قاباغيندا حيه‌ته بير ورق يازيلي كاغيذ آتدي. آتا كاغيذي گؤتوروب اوخودو." سيز توركلره كندي بوشالتماق اوچون اؤچ گون وقت وئريلير. گئتمه سنيز بختينيزدن كوسون.
آتاني ائله‌بيل ايلديريم ووردو. بوتون ائو- ائشيك، حيه‌ت- باجا باشينا فيرلاندي.
همين مكتوبدان سونرا آتا و آنا، بالا ائودن چيخماديلار. گئجه‌ني ـ گوندوزو قاتلاييب، يير، ييغيش ائله‌ديلر.
وئريلن وعده سحري گون تامام اولوردو. اونلار بو آخشام قارانليق دوشن‌كيمي داغلا، داشلا آشاغي قاچمالي ايديلار. هر اوچو پال پالتاريني اوست- اوسته گئيينميشديلر. آتا و آنا هره‌سي ايكي باغلاما دوزلتميشدي. تويوقلاريني هيندن، ايتلريني زنجيردن آچيب بوراخماق قاليردي.
آتا ائله‌بيل اؤز اليله اكيب، يئتيشديردييي آغاجلارا ويدالاشيردي. آنا گؤزو ياشلي حالدا آستادان باياتي دئييب خانيمانيله ويدالاشيردي. ظريف ايسه گؤزه ده يميردي.
قافيلدان اونلارين ائولرينين اوستوندن گولـله‌لر آچيلماغا باشلادي. آنادا، آتادا اؤزلرينی ايتيرديلر. آتش چوخالدی, گولـله ياغيش کيمی ياغماغا باشلادی. آتا- آنا دونندن حاضيرلاديقلاري چانتالاريني گؤتورمه يه، ايتلريني زنجيردن ، تويوقلاريني هيندن بئله آچيب بوراخماغا ماجال تاپماديلار. تلاش ايچينده ظريفي آختاريرديلار. قيز ائله‌بيل يوخا چيخميشدي. آتيلان آتشلر ايسه اونلارا آمان وئرميردي. باغين آياغيندا دوغرو دره بويو قاچماغا باشلاديلار.چوخلي اوزاقلاشاندان سونرا بير تپه‌نين اوستونه چيخيب ائولرينه طرف بويلانديلار.گؤزلرينه اينانماديلار. ائولري اود- آلوو ايچه‌ريسينده آليشيب يانيردي.
آتا دريندن آه چكره‌ك :
ـ آي نامرد سورن ـ دئدي ـ بو سنين ايشيندي. يقين اوشاغي‌دا اؤلدوره جكلر.
آرتيق اونلارين آياقلاري يئر توتموردو. قونشو كندلردنده دره بويو قاچيب آشاغييا توكولوردولر.آتا نه قده‌ر تاكيد ائديرديسه آناني بئلي بوكولو حالدا اوتوردوغو يئردن ترپده بيلميردي.
ـ هئچ هارا گئدن دئييلم. بالاملا بورادا اؤله جه يم.گئجه‌نين بو سويوغون، سازاغين ايچينده ديري گؤزلو آچديلار. قورخودان سسلريني چيخاريب دويونجا آغلايادا بيلميرديلر. كندين ايتلري سحره‌كيمي اولاشديلار.
دان يئري سوكولنده آتا آناني زورلا راضي ساليب اوشاغين دالينجا يوللاندي.آيين آيدينليغی اولدوغوندان سحر تورانليغی آيدين گؤرونوردو. آتــــــــا باغلارينين آياغيندا دايانيب ائولرينين و تؤوله لرينين سون توستولرينه تاماشا ائتدي. جسارت ائديب ائولرينه ياخين دوشه بيلمدي. قيزي، ظريفين ساغ قالماسينا بوتون اوميدي تامام كسيلدي.
كول ديبيندن يئنيجه آچيلميش بنووشه‌لر بويلانيردي. آتا گؤزو ياشلي قيزين خاطيرلادي. آخي ظريف هر ياز گلنده بو ظريف بنووشه‌لردن دسته باغلاييب اونا باغيشلاياردي.
آتا يول گؤزله‌ين آنايا نه جواب وئره‌جه‌ييني بيلميردي، و اونو يئريندن قالديريب بو قاچانلار دسته‌سينه نئجه قوشاجاغيني بيلميردي. آتا بو فيكيرـ خيال ايچينده قارشيسينداكي كولون ديبينده بير قارالتي گؤردو. ياخين گلدي. بو قيز اوشاغين جسدييدي. شاختادان قاراليب بوزارميش بو جسد اونون جيير پاراسي اولان ظريف ايدي. قيز آل قانين ايچينده‌ايدي. كوكسونده نئچه ـ نئچه گولـله ياراسي وارايدي. سيخيلميش اووجوندا ايسه قانلي بنووشه چيچکلری!
آتا گؤزلرينه، اينانمادي. جسدي پالتارلاريندان تانيسادا، قالديريب اوزونه باخدي. ديزلري قاتلاندي، يئره اوتوردو. بالاسينين اوزونه حيرتله باخدي. ظريف بارماقلار آراسيندا بويلانان قانلي بنووشه‌لري گؤروب وار سسيله هايقيرماق و بو وحشيلييي، بو عدالتسيزلييي بوتون دونيايا جارچكمك ايستدي، آنجاق باجارمادي.
قيزين قوللاري اوستونه قالديريب، شاختادان دونوب بوزارميش اوزوندن اؤپدو. سوندا آناني قويوب گلدييي سمته يوللاندي.
سون
*) اوخودوغونوز ناغيل، آذربايجان رئسپوبليکاسيندا، اوشاقلار ادبياتي فئستيواللاريندا اؤنملی جايزه لره لاييق گؤرونموشدور.
